ନୂଆଦିଲ୍ଲୀ: ବିସ୍ଫୋରକ ବ୍ୟାଟ୍ସମ୍ୟାନ କ୍ରିସ୍ ଗେଲଙ୍କୁ କିଏ ନଜାଣେ । ଦିନିକିଆ ହେଉ ବା ଟି-୨୦ ଗେଲ୍ କ୍ରିଜରେ ଥିଲେ ଦର୍ଶକଙ୍କ ଉତ୍ସାହ କାହିଁରେ କ’ଣ । ଗେଲଙ୍କ ଅନେକ ରେକର୍ଡ଼ କେହି ଭାଙ୍ଗିନାହାନ୍ତି ଓ ନିକଟ ଭବିଷ୍ୟତରେ ବି ଭାଙ୍ଗିବ କି ନାହିଁ ସନ୍ଦେହ । ହେଲେ ଏବେ ଗେଲ୍ ବଡ଼ ଦୁଃଖରେ ଥିବାପରି ଲାଗୁଛି । ନ ହେଲେ ନିଜ ଦେଶର ସାଥୀ କ୍ରିକେଟର ରାମନରେଶ ସରୱନଙ୍କୁ ‘ସାପ’ ସହ ତୁଳନା କରି ନ ଥାନ୍ତେ କିମ୍ବା କରୋନା ଭୂତାଣୁଠାରୁ ଭୟଙ୍କର ବୋଲି କହି ନ ଥାନ୍ତେ । ସମସ୍ତେ ଜାଣନ୍ତି କ୍ରିସ୍ ଗେଲ୍ ଓ ଏକଦା ତାଙ୍କର ସାଥୀ କ୍ରିକେଟର ରାମନରେଶ ସରୱନଙ୍କ ଭିତରେ ସମ୍ପର୍କ କେବେ ଭଲ ନ ଥିଲା । ଏହି ସମ୍ପର୍କ ଏବେ ଆହୁରି ତିକ୍ତ ହୋଇଛି । ସ୍ଥିତି ଏମିତି ହୋଇଛି ଯେ ନିକଟରେ ଏକ ୟୁଟ୍ୟୁବ୍ ବାର୍ତାରେ ଗେଲ୍ ରାମନରେଶଙ୍କୁ ଅତି କଟୁ ଭାଷାରେ ଗାଳି ଦେଇଛନ୍ତି । ଅଭିଶାପ ଦେଇଛନ୍ତି ।
ଅସଲ କଥା ହେଲା ୱେଷ୍ଟଇଣ୍ଡିଜର ଏହି ଦୁଇ ପୂର୍ବତନ ଅଧିନାୟକଙ୍କ ମଧ୍ୟରେ ରହି ଆସିଥିବା ସମ୍ପର୍କ । ନିକଟରେ କାରିବିୟାନ ପ୍ରିମିୟର ଲିଗରେ କ୍ରିସ୍ ଗେଲଙ୍କୁ ଜାମାଇକା ଦଳ ପକ୍ଷରୁ ନିଆଯାଇ ନ ଥିଲା । ଏହାକୁ ନେଇ ଗେଲ୍ ପ୍ରଚଣ୍ଡ ଅସୁଖୀ । ଏଥିପାଇଁ ସେ ରାମନରେଶଙ୍କୁ ଦାୟୀ କରିଛନ୍ତି । ତାଙ୍କ ବାଟ ବନ୍ଦ କରିବାରେ ରାମନରେଶ କୁଆଡ଼େ ପ୍ରମୁଖ ଭୂମିକା ଗ୍ରହଣ କରିଛନ୍ତି ବୋଲି ଗେଲ୍ ମନେ କରୁଛନ୍ତି । ଗେଲ୍ କହିଛନ୍ତି ରାମନରେଶ ଫ୍ରାଞ୍ଚାଇଜି ନିଜ ହାତରେ ରଖିବାକୁ ଚାହୁଁଛନ୍ତି ତେଣୁ ଷଡ଼ଯନ୍ତ୍ର କରି ତାଙ୍କୁ (ଗେଲଙ୍କୁ) ଏଥିରୁ ଦୂରେଇ ରଖିଛନ୍ତି । ଟିମରେ ତାଙ୍କୁ ସ୍ଥାନ ନ ମିଳିବା ପଛରେ ରାମନରେଶ ହିଁ ଦାୟୀ ବୋଲି ଗେଲ୍ କହିଛନ୍ତି । ନିଜ ୟୁଟ୍ୟୁବ୍ ଚ୍ୟାନେଲରେ ଗେଲ୍ କହିଛନ୍ତି – ସରୱନ, ତୁମେ କରୋନା ଭୂତାଣୁଠାରୁ ବି ଖରାପ । ଜାମାଇକାକୁ ନେଇ ଯାହା ଘଟିଲା ସେଥିରେ ତୁମର ବଡ଼ ଭୂମିକା ଅଛି । କାରଣ ତୁମେ ଜାମାଇକା ଟିମ୍ ମାଲିକଙ୍କ ଅତି ଘନିଷ୍ଠ । ତୁମେ ମୋର ଶେଷ ଜନ୍ମଦିନ ପାର୍ଟିରେ ଥିଲ ଓ ଭାଷଣ ଦେଉଥିଲ । ମାତ୍ର ତୁମେ ଗୋଟିଏ ସାପ, ତୁମେ ପୁରା ଅପରିଣତ, ଲୋକଙ୍କ ପିଠିରେ ଛୁରା ଭୁଷିବାରେ ତୁମେ ପାରଙ୍ଗମ ।
https://youtu.be/68CNXdkYT7w
