ସମୁଦ୍ରରେ ଓଲଟିଲା ଡଙ୍ଗା: ଜଣେ ମତ୍ସ୍ୟଜୀବୀ ମୃତ, ବର୍ତ୍ତିଲେ ୪

ଛତ୍ରପୁର: ଗଞ୍ଜାମ ବ୍ଲକ ଅନ୍ତର୍ଗତ ପୋଡ଼ମପେଟାରେ ସମୁଦ୍ର ଭିତରେ ଡ଼ଙ୍ଗା ଓଲଟି ପଡ଼ିବାରୁ ଜଣେ ମତ୍ସ୍ୟଜୀବୀଙ୍କ ମୃତ୍ୟୁ ଘଟିଛି।ଅନ୍ୟ ୪ ମତ୍ସ୍ୟଜୀବୀ ପହଁରି ପହଁରି କୂଳକୁ ଫେରିଆସିଛନ୍ତି। ମୃତ ମତ୍ସ୍ୟଜୀବୀ ହେଲେ ପଡୋମପେଟା ଗ୍ରାମର ସି. ଏଚ. ଦାନେୟା। ସୂଚନା ମୁତାବକ, ଶୁକ୍ରବାର ରାତିରେ ପଡ଼ୋମପେଟା ଗ୍ରାମର ୫ ମତ୍ସ୍ୟଜୀବୀ ସମୁଦ୍ରକୁ ମାଛ ମାରିବାକୁ ଯାଇଥିବା ବେଳେ ହଠାତ ବର୍ଷା ପବନ ମାଡ଼ିଆସିଥିଲା। ଫଳରେ ଡଙ୍ଗାଟି ଭାରସାମ୍ୟ ହରାଇ ସମୂଦ୍ର ମଝିରେ ଓଲଟି ପଡ଼ିଥିଲା। ୪ ଜଣ ମତ୍ସ୍ୟଜୀବୀ ପହଁରି ପହଁରି ପଳାଇ ଆସିଥିବାବେଳେ ଦାନେୟା ନିଖୋଜ ହୋଇଯାଇଥିଲେ। ସ୍ଥାନୀୟ ଗ୍ରାମବାସୀ ଅନ୍ୟ ଡଙ୍ଗା ସାହାଯ୍ୟରେ ଉଦ୍ଧାର କାର୍ଯ୍ୟରେ ଲାଗି ପଡ଼ିଥିଲେ। ଶନିବାର ସକାଳେ ପୁରୀ ଜିଲା କୃଷ୍ଣପ୍ରସାଦ ବ୍ଲକର ନନ୍ଦଳା ଗ୍ରାମ ନିକଟ ସମୁଦ୍ରକୂଳରୁ ଦାନେୟାଙ୍କ ମୃତଦେହ ମିଳିଛି।