କଲକତା: କରୋନା ଭୂତାଣୁକୁ ନେଇ ସାରା ଦେଶ ବିବଶ -ବ୍ୟଥିତ । ଦେଶର ଅର୍ଥନୀତି ଭୁଶୁଡ଼ିବା ଅବସ୍ଥାରେ । ବିଭିନ୍ନ କଳକାରଖାନା ଓ ସରକାରୀ କାର୍ଯ୍ୟକ୍ରମ ବନ୍ଦ । ଲୋକଙ୍କ ପାଖରେ କାମ ନାହିଁ, ଖାଇବାକୁ ଟଙ୍କା ନାହିଁ । ଦେଶର ୪ଟି ରାଜ୍ୟର ୧୧ଟି ସହରରେ ପରିସ୍ଥିତି ଖରାପ ଏବଂ ଏହା ମଧ୍ୟରୁ କେବଳ ୭ଟି ସହର ପଶ୍ଚିମବଙ୍ଗରେ । ତେଣୁ କେନ୍ଦ୍ର ସରକାର ପଶ୍ଚିମବଙ୍ଗରେ ଦୁଇ ଆଇଏମସିଟି ପଠାଇବାକୁ ନିଷ୍ପତ୍ତି ନେଇଛନ୍ତି । ଏହି ଟିମ୍ରେ କେନ୍ଦ୍ରର ଭିନ୍ନ ଭିନ୍ନ ମନ୍ତ୍ରଣାଳୟର ଅଧିକାରୀ ଓ ମନ୍ତ୍ରୀଙ୍କୁ ନେଇ ଗଠିତ ଏହି ଟିମ୍ ରାଜ୍ୟର କରୋନା ମୁକାବିଲା ପ୍ରସ୍ତୁତି ଏବଂ ମୁଖ୍ୟତଃ ଲକ୍ଡାଉନ୍ର ସ୍ଥିତି କେମିତି ରହିଛି ତାର ସମୀକ୍ଷା କରିବେ । କେନ୍ଦ୍ର ସରକାରଙ୍କ ଗୃହ ମନ୍ତ୍ରଣାଳୟ ଏ ସମ୍ପର୍କରେ ପଶ୍ଚିମବଙ୍ଗ ମୁଖ୍ୟ ସଚିବଙ୍କୁ ମଧ୍ୟ ଚିଠି ଲେଖିଛନ୍ତି ।
ଏପରି ଅବସ୍ଥାରେ ବିଭିନ୍ନ ରାଜ୍ୟର ସ୍ଥିତି ଅନୁଧ୍ୟାନ ପାଇଁ କେନ୍ଦ୍ର ସରକାରଙ୍କ ଦ୍ବାରା ଗଠିତ ମନ୍ତ୍ରୀସ୍ତରୀୟ କମିଟି (ଆଇଏମସିଟି)କୁ ବିରୋଧ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ସେ କହିଛନ୍ତି ଯେ ଏହି କମିଟିକୁ ସେ ରାଜ୍ୟରେ ପୂରାଇ ଦେବେ ନାହିଁ । ତେବେ କୌତୂହଳର କଥା ହେଉଛି ମମତା ଏହି ଘୋଷଣା କରିବା ବେଳକୁ କମିଟି କଲକତାରେ ଆସି ପହଞ୍ଚି ସାରିଥିଲେ । ଏହାପରେ ମମତାଙ୍କ ରାଗ ପଞ୍ଚମକୁ ଉଠି ଯାଇଥିଲା । ଟ୍ବିଟ୍ କରି ସେ କେନ୍ଦ୍ର ସରକାରଙ୍କ ଏପରି ପଦକ୍ଷେପକୁ କଡ଼ା ସମାଲୋଚନା କରିଥିଲେ । ଏହି ଟିମ୍କୁ ରାଜ୍ୟଗୁଡିକୁ ପଠାଇବାର କାରଣ ବିଷୟରେ ପଚାରିଛନ୍ତି ମମତା । ମମତା ଲେଖିଛନ୍ତି ଯେ, ଆମେ କରୋନା ମହାମାରୀ ବିରୋଧରେ କେନ୍ଦ୍ର ସରକାରଙ୍କ ସହଯୋଗ ଏବଂ ପ୍ରସ୍ତାବର ସ୍ଵାଗତ କରୁଛୁ । ମାତ୍ର କେନ୍ଦ୍ର ସରକାର ପଶ୍ଚିମବଙ୍ଗ ସମେତ କିଛି ଅନ୍ୟ ରାଜ୍ୟରେ ଆଇଏମସିଟିକୁ ପଠାଇବାକୁ ଯେଉଁ ନିଷ୍ପତ୍ତି ନେଇଛନ୍ତି, ଏହାର ଉଦ୍ଦେଶ୍ୟ କଣ ରହିଛି ବୁଝି ହେଉନି।
କେନ୍ଦ୍ର ଚିଠିରେ କହିଛି ଯେ, ଏହା ସ୍ପଷ୍ଟ ଯେ ପଶ୍ଚିମବଙ୍ଗର କୋଲକାତା, ହାଓ୍ଵଡା, ପୂର୍ବ ମେଦିନିପୁର, ଉତ୍ତର ୨୪ ପ୍ରଗଣା, ଦାର୍ଜିଲିଂ, କେଲିମପୋଙ୍ଗ ଓ ଜଳପାଇଗୁଡିରେ ଅବସ୍ଥା ଠିକ୍ ନୁହଁ । ମମତା ଏଥିରେ ଆପତ୍ତି ଉଠାଇଛନ୍ତି । କେଉଁ ଆଧାରରେ ଏହି ସବୁ ଜିଲ୍ଲାକୁ ଚିହ୍ନଟ କରାଯାଇଛି ସେ ସମ୍ପର୍କରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଗୃହ ମନ୍ତ୍ରୀ ଅମିତ୍ ଶାହାଙ୍କୁ ପ୍ରଶ୍ନ କରିଛନ୍ତି । 
