ସମାଜ ପୋର୍ଟାଲ ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଆସାମର କୋକ୍ରାଝରଠାରେ ବୋଡୋ ରାଜିନାମା ସ୍ୱାକ୍ଷର ଉତ୍ସବରେ ଯୋଗଦେବେ। ଏହି ମହୋତ୍ସବର ସଫଳତା ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ପ୍ରଧାନମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ବହୁସ୍ତରୀୟ ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇଛି। ଏହି ମହୋତ୍ସବରେ ପ୍ରାୟ ୫ ଲକ୍ଷ ଲୋକ ଯୋଗଦେବାର ସମ୍ଭାବନା ରହିଛି। ଗତକାଲି ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ବୋଡୋ ଛାତ୍ର ସଂଗଠନ ପକ୍ଷରୁ ଏକ ବାଇକ୍ ର୍ୟାଲି ଆୟୋଜିତ ହୋଇଥିଲା। ପ୍ରଧାନମନ୍ତ୍ରୀଙ୍କ ବ୍ୟତୀତ ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ ଓ ତାଙ୍କର ମନ୍ତ୍ରିମଣ୍ଡଳର ସହଯୋଗୀମାନେ ଏହି ଉତ୍ସବରେ ଯୋଗଦେବେ।
ଗତମାସ ୨୭ ତାରିଖରେ କେନ୍ଦ୍ର ସରକାର, ଆସାମ ଓ ଏନ୍ଡିଏପି ମଧ୍ୟରେ ଏକ ତ୍ରିପାକ୍ଷିକ ରାଜିନାମା ସ୍ୱାକ୍ଷରିତ ହୋଇଥିଲା। ଏହି ରାଜିନାମାରେ ଆସାମର ସର୍ବବୃହତ ବୋଡ଼ୋ ଜନଜାତିଙ୍କୁ ରାଜନୈତିକ ଓ ଆର୍ଥିକ ସୁବିଧା ପ୍ରଦାନ କରିବାର ଲକ୍ଷ୍ୟ ରଖାଯାଇଛି। ଆସନ୍ତା ୩ ବର୍ଷ ମଧ୍ୟରେ ତିନି ପକ୍ଷଙ୍କର ସମାନୁପାତିକ ଅବଦାନରେ ପ୍ରାୟ ୧ହଜାର ୫୦୦ କୋଟି ଟଙ୍କାର ଆର୍ଥିକ ଯୋଜନା କାର୍ଯ୍ୟକାରୀ କରାଯିବା ନେଇ ବୁଝାମଣା ହୋଇଛି।
