ନୂଆଦିଲ୍ଲୀ: ଶିଳ୍ପୋଦ୍ୟୋଗୀଙ୍କୁ ସହଜରେ ଋଣ ପ୍ରଦାନ ପାଇଁ କେନ୍ଦ୍ର ସରକାର କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ କ୍ଷେତ୍ରରେ ମୂଲ୍ୟାଙ୍କନ ବ୍ୟବସ୍ଥା ପ୍ରଚଳନ କରିବାକୁ ବିଚାର କରୁଥିବା କେନ୍ଦ୍ରମନ୍ତ୍ରୀ ନୀତିନ୍ ଗଡ଼କରି କହିଛନ୍ତି। ଚେନ୍ନାଇଠାରେ ମହିଳା ଶିଳ୍ପୋଦ୍ୟୋଗୀଙ୍କୁ ଉଦବୋଧନ ଅବସରରେ ସେ କହିଛନ୍ତି ଯେ ଦିଲ୍ଲୀରୁ ମଥୁରା ଏବଂ ଇଟାୱା ଦେଇ ଆଲ୍ଲାହାବାଦ ପର୍ଯ୍ୟନ୍ତ ଜଳପଥ ସଂଯୋଗ ପାଇଁ ଏକ ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତ କରାଯାଉଛି। ସେ କହିଛନ୍ତି, ଶିଳ୍ପ କ୍ଷେତ୍ରରେ ଶକ୍ତି ଯୋଗାଣଜନିତ ଖର୍ଚ୍ଚ କମ୍ କରିବାପାଇଁ ସରକାର ଚେଷ୍ଟା କରୁଛନ୍ତି। ଏମ୍.ଏସ୍.ଏମ୍.ଇ. କ୍ଷେତ୍ରକୁ ବଜାର ସୁବିଧା ଯୋଗାଇ ଦେବାପାଇଁ କେନ୍ଦ୍ର ସରକାର ଏକ ଜାତୀୟ ପୋର୍ଟାଲ୍ ପ୍ରସ୍ତୁତ କରୁଛନ୍ତି ବୋଲି ଗଡ଼କରି କହିଛନ୍ତି।
ସେ କହିଛନ୍ତି, ଏମ୍.ଏସ୍.ଏମ୍.ଇ. କ୍ଷେତ୍ରପାଇଁ ଜାତୀୟ କମ୍ପାନୀ ଲ’ ଟ୍ରିବ୍ୟୁନାଲ୍ ଢାଞ୍ଚାରେ ଏକ ଟ୍ରିବ୍ୟୁନାଲ୍ ପ୍ରତିଷ୍ଠା କରିବାକୁ କେନ୍ଦ୍ର ସରକାର ବିଚାର କରୁଛନ୍ତି। ଗଡ଼କରି ଆସନ୍ତା ୫ ବର୍ଷରେ ଏମ୍.ଏସ୍.ଏମ୍.ଇ. କ୍ଷେତ୍ରରେ ୫ କୋଟିରୁ ଅଧିକ ନିଯୁକ୍ତି ସୃଷ୍ଟି କରିବାପାଇଁ କେନ୍ଦ୍ର ସରକାର ଲକ୍ଷ୍ୟ ଧାର୍ଯ୍ୟ କରିଥିବା କହିଛନ୍ତି।
