ନୂଆଦିଲ୍ଲୀ: କଙ୍ଗୋରେ ନିଯୁକ୍ତ ଭାରତୀୟ ସେନା ଅଧିକାରୀ ନିଖୋଜ ହୋଇଯାଇଛନ୍ତି। ତାଙ୍କ ନାମ ଲ୍ୟୁଟନାଣ୍ଟ କଲୋନେଲ ଗୌରବ ସୋଲାଙ୍କି। ସେ ଗତ ଶନିବାର ଅପରାହ୍ନରେ କିଭୁ ହ୍ରଦର କାୟାକିଙ୍ଗ ଅଞ୍ଚଳକୁ ଯାଇଥିଲେ। ସେଠାରୁ ସେ କେଉଁଆଡ଼େ ନିଖୋଜ ହୋଇଯାଇଛନ୍ତି। ତାଙ୍କୁ ଖୋଜିବା ଲାଗି ସର୍ଚ୍ଚ ଅପରେଶନ ଜାରି ରହିଥିଲେ ହେଁ ବର୍ତ୍ତମାନ ସୁଦ୍ଧା କୌଣସି ପତ୍ତା ମିଳିପାରି ନାହିଁ।
ରିପୋର୍ଟ ଅନୁସାରେ, ଗୌରବଙ୍କ ସମେତ ସେନାର ୩ ଅଧିକାରୀ କଙ୍ଗୋରେ ଜାତିସଂଘ ଶାନ୍ତି ରକ୍ଷା ଅଭିଯାନରେ ନିଯୁକ୍ତ ହୋଇଥିଲେ। ସେମାନେ କିଭୁ ହ୍ରଦ ନିକଟ କାୟାକିଂ ଅଞ୍ଚଳକୁ ଯାଇଥିଲେ। ୨ ଅଧିକାରୀ ଫେରିଆସିଥିବାବେଳେ ଗୌରବଙ୍କ ପତ୍ତା ମିଳୁନାହିଁ। ଗୌରବଙ୍କ ପତ୍ତା ନ ମିଳିବାରୁ ସେ କିଭୁ ହ୍ରଦରେ ବୁଡ଼ି ଯାଇଥିବା ସନ୍ଦେହ କରାଯାଉଛି। ତାଙ୍କ ସହ ଥିବା ଅନ୍ୟ ୨ ଅଧିକାରୀ ହ୍ରଦରେ ତାଙ୍କୁ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ସନ୍ଧାନ ମିଳିପାରି ନାହିଁ।
