ନୂଆଦିଲ୍ଲୀ: ଉତ୍ତରପ୍ରଦେଶ ଏବଂ ବିହାର ଦେଇ ଯାଇଥିବା ଗଙ୍ଗା ନଦୀରେ ୯୬ ମୃତଦେହ ଭାସୁଛି। ସେଗୁଡ଼ିକ ମଧ୍ୟରୁ ଅନେକ ମୃତଦେହ ପଚିଯାଇଥିବାବେଳେ ଆଉ କିଛି ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଏହାକୁ ନେଇ ନଦୀ ଉପକୂଳବାସୀଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି। କରୋନାରେ ପ୍ରାଣ ହରାଇବା ପରେ ଅନ୍ତିମ ସଂସ୍କାର କରିପାରି ନ ଥିବା ଲୋକମାନେ ସେମାନଙ୍କ ପରିଜନଙ୍କ ମୃତଦେହକୁ ନଦୀରେ ଭସାଇ ଦେଉଛନ୍ତି ବୋଲି ପ୍ରଶାସନ ଅନୁମାନ କରିବା ପରେ ଏହାକୁ ନେଇ ଚିନ୍ତା ପ୍ରକାଶ ପାଇଛି।
ବିହାରର ବକ୍ସାର ଜିଲା ଦେଇ ଯାଇଥିବା ଗଙ୍ଗା ନଦୀରେ ୭୧ ମୃତଦେହ ଭାସୁଥିବା ଦେଖାଯାଇଥିବାବେଳେ ପଡ଼ୋଶ ଉତ୍ତରପ୍ରଦେଶର ଗାଜିପୁର ଜିଲା ଅନ୍ତର୍ଗତ ନଦୀରୁ ୨୫ ମୃତଦେହ ମିଳିଛି। ସ୍ଥାନୀୟ ପ୍ରଶାସନ ପକ୍ଷରୁ ଏ ସମ୍ପର୍କରେ କେନ୍ଦ୍ର ସରକାରଙ୍କୁ ଅବଗତ କରାଯାଇଛି। ଏହା ପରେ କେନ୍ଦ୍ର ସରକାର ଏହି ପ୍ରସଙ୍ଗକୁ ଗମ୍ଭୀରତାର ସହିତ ନେଇଛନ୍ତି। କେନ୍ଦ୍ର ଜଳଶକ୍ତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ଘଟଣାର ତଦନ୍ତ ପାଇଁ ଉଭୟ ରାଜ୍ୟକୁ ନିର୍ଦେଶ ଦେଇଛନ୍ତି।
ଶେଖାୱତ କହିଛନ୍ତି, ଗଙ୍ଗାନଦୀରେ ମୃତଦେହ ଭସାଯିବା ଦୁର୍ଭାଗ୍ୟଜନକ। ଏହାର ତଦନ୍ତ ନିଶ୍ଚିତ ହେବ। ଗଙ୍ଗା ନଦୀର ଶୁଦ୍ଧତା ଏବଂ ସ୍ବଚ୍ଛତା ବଜାୟ ରଖିବା ଲାଗି ମୋଦୀ ସରକାର ପ୍ରତିବଦ୍ଧ ବୋଲି ସେ କହିଛନ୍ତି।
ବକ୍ସାର ଏସପି ନୀରଜ କୁମାର କହିଛନ୍ତି, ପୁଲିସ ବର୍ତ୍ତମାନ ସୁଦ୍ଧା ୭୧ଟି ମୃତଦେହକୁ ପାଣିରୁ ବାହାର କରିଛି। ସବୁ ମୃତଦେହଗୁଡ଼ିକର ବ୍ୟବଚ୍ଛେଦ କରାଯିବ। ସେଥିରୁ ଡିଏନଏ ଏବଂ କୋଭିଡ ନମୁନା ସଂଗ୍ରହ କରି ପରୀକ୍ଷା ମଧ୍ୟ କରାଯିବ। ସରକାରଙ୍କ କୋଭିଡ ପ୍ରୋଟୋକଲ ଅନୁସାରେ ଶବଗୁଡ଼ିକୁ ପୋତିଦିଆଯିବ।
ଉତ୍ତରପ୍ରଦେଶର ଏଡିଜି ପ୍ରଶାନ୍ତ କୁମାର କହିଛନ୍ତି, ବିହାରରେ ମୃତଦେହଗୁଡ଼ିକ ମିଳିଛି। ଏହାର ତଦନ୍ତ କରିବା ଦାୟିତ୍ଵ ବିହାର ସରକାରଙ୍କର। ଏହି ଘଟଣାରେ ଆମକୁ ଦୋଷ ଦେବା ଅନୁଚିତ।
