ଚଣ୍ଡିଗଡ: ପ୍ରବଳ ବର୍ଷା ଯୋଗୁଁ ରାବି, ବ୍ୟାସ ଓ ସତଲେଜ୍ ନଦୀରେ ଜଳସ୍ତର ବୃଦ୍ଧି ପାଇଛି। ଫଳରେ ପଞ୍ଜାବର ୮ଟି ଜିଲା ଗୁରୁଦାସପୁର, ପଠାନକୋଟ, ଅମୃତସର, ହୋସିଆରପୁର, କପୁରତାଲା, ତରନ ତରନ, ଫିରୋଜପୁର ଓ ଫାଜିଲକାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ବନ୍ୟା ଯୋଗୁଁ ଗୁରୁଦାସପୁର ଡାବୁରି ଗାଁସ୍ଥିତ ଜବାହର ନବୋଦୟ ବିଦ୍ୟାଳୟର ୪୦୦ ଛାତ୍ର ଓ ୪୦ଜଣ ଶିକ୍ଷକ ଫସି ରହିଛନ୍ତି। ଗୁରୁଦାସପୁର-ଡୋରାଙ୍ଗଲା ରାସ୍ତାରେ ଅବସ୍ଥିତ ଏହି ବିଦ୍ୟାଳୟ ନିକଟରେ ପ୍ରବାହିତ ହେଉଥିବା କିରନ ନାଳରେ ବନ୍ୟା ପାଣି ଆସି ସ୍କୁଲ ଚାରିପଟେ ଘେରି ଯାଇଛି। ସେହିପରି ମାଧୋପୁରରୁ ୨୨ଜଣ ସିଆରପିଏଫ୍ ଯବାନ ଓ ୩ଜଣ ସାଧାରଣ ନାଗରିକଙ୍କୁ ସେନା ହେଲିକପ୍ଟର ସହାୟତାରେ ଉଦ୍ଧାର କରାଯାଇଛି। ସିଆରପିଏଫ୍ ଯବାନମାନେ ଆଶ୍ରୟ ନେଇଥିବା ଏକ କୋଠା ବନ୍ୟା ପାଣିରେ ବୁଡି ଯାଇଥିଲା। ଯବାନମାନଙ୍କୁ ଉଦ୍ଧାର କରିବାର କିଛି ସମୟ ପରେ କୋଠାଟି ଭୁଶୁଡି ପଡିଥିଲା। ପ୍ରତିକୂଳ ପାଗ ସତ୍ତ୍ବେ ବୁଧବାର ସକାଳ ୬ଟାରେ ସେନା ହେଲିକପ୍ଟର ବିପଦସଂକୁଳ କୋଠାରୁ ସିଆରପିଏଫ୍ ଯବାନ ଓ ଅନ୍ୟ ୩ ନାଗରିକଙ୍କୁ ଉଦ୍ଧାର କରିଥିଲା।
ବୁଧବାର ସକାଳେ ରାବି ନଦୀରେ ୪.୦୬ ଲକ୍ଷ କ୍ୟୁସେକ ଜଳ ପ୍ରବାହିତ ହେଉଥିବା ରେକର୍ଡ କରାଯାଇଛି। ଜଳ ପ୍ରବାହ ବୃଦ୍ଧି ଯୋଗୁଁ ରଞ୍ଜିତ ସାଗର ଡ୍ୟାମ୍ରେ ବିପଦ ସଂକେତ ଅତିକ୍ରମ କରିଛି। ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ୍ ପଠାନକୋଟ୍ ଓ ଗୁରୁଦାସପୁର ଜିଲା ଗସ୍ତ କରିବା ପୂର୍ବକ ବନ୍ୟା ପରିସ୍ଥିତିର ଅନୁଧ୍ୟାନ କରିଛନ୍ତି। ବନ୍ୟା ପ୍ରଭାବିତ ଅଞ୍ଚଳରେ ରିଲିଫ୍ ଓ ଉଦ୍ଧାରକାର୍ଯ୍ୟକୁ ସେ ସମୀକ୍ଷା କରିଛନ୍ତି। ବନ୍ୟା ପରିସ୍ଥିତିର ପରିଚାଳନା ନିମନ୍ତେ ରାଜ୍ୟ ସରକାର ଏକ କମିଟି ଗଠନ କରିଛନ୍ତି।
