ଭୁବନେଶ୍ବର : ମଙ୍ଗଳବାର ରାଜ୍ୟର ସମ୍ବଲପୁର, କେନ୍ଦୁଝର, ଢ଼େଙ୍କାନାଳ, କଟକ, ପୁରୀ ଓ ଭୁବନେଶ୍ବର ଆଦି ୬ଟି ଲୋକସଭା ଓ ଏହି ସମସ୍ତ ସଂସଦୀୟ କ୍ଷେତ୍ର ଅନ୍ତର୍ଗତ ୪୨ଟି ବିଧାନସଭା ଆସନରେ ଭୋଟ ଗ୍ରହଣ ଆରମ୍ଭ ହୋଇଛି । ପୂର୍ବାହ୍ନ ୫.୩୦ରେ ମକପୋଲ କରାଯାଇ ୭ଟାରୁ ମତଦାନ ଆରମ୍ଭ ହୋଇଛି। ଏହି ପର୍ଯ୍ୟାୟ ମତଦାନ ପାଇଁ ୧୦ଟି ଜିଲା ଅନ୍ତର୍ଭୁକ୍ତ ଏହିସବୁ ନିର୍ବାଚନମଣ୍ଡଳୀରେ ୧୦ ହଜାର ୪୬୪ଟି ବୁଥ କରାଯାଇଛି। ତେବେ ୩୩% ଅର୍ଥାତ ୩୧୮୬ଟି ସମ୍ବେଦନଶୀଳ ବୁଥ ଚିହ୍ନଟ କରାଯାଇଛି।
ତୃତୀୟ ପର୍ଯ୍ୟାୟରେ ଲୋକସଭା ପାଇଁ ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ପୂର୍ବତନ ପୂର୍ତ୍ତ ସଚିବ ନଳିନୀକାନ୍ତ ପ୍ରଧାନ, ନୀତେଶ ଗଙ୍ଗଦେବ, ପୂର୍ବତନ ସାଂସଦ ଶରତ ପଟ୍ଟନାୟକ, ପୂର୍ବତନ କେନ୍ଦ୍ରମନ୍ତ୍ରୀ କାମାଖ୍ୟା ପ୍ରସାଦ ସିଂହଦେଓ, ବିଧାୟକ ମହେଶ ସାହୁ, ପୂର୍ବତନ ସାଂସଦ ରୁଦ୍ରନାରାୟଣ ପାଣି, ସାଂସଦ ପିନାକୀ ମିଶ୍ର, ଡ଼କ୍ଟର ସମ୍ବିତ ପାତ୍ର, ସତ୍ୟପ୍ରକାଶ ନାୟକ, ଭୁବନେଶ୍ବରରୁ ଅରୂପ ପଟ୍ଟନାୟକ, ଅପରାଜିତା ଷଡ଼ଙ୍ଗୀ, ଜନାର୍ଦ୍ଦନ ପତି ପ୍ରମୁଖ ଅଛନ୍ତି। ସେହିପରି କଟକ ଲୋକସଭା ଆସନରେ ସାଂସଦ ଭର୍ତ୍ତୃହରି ମହତାବ, ପୂର୍ବତନ ପୁଲିସ ଡିଜି ପ୍ରକାଶ ମିଶ୍ର, ବରିଷ୍ଠ ରାଜନେତା ପଞ୍ଚାନନ କାନୁନଗୋଙ୍କ ମଧ୍ୟରେ ପ୍ରତିଦ୍ବନ୍ଦିତା ହେଉଛି।
