ପୁଣେ: ମହାରାଷ୍ଟ୍ରରେ ପ୍ରବଳ ବର୍ଷା ଯୋଗୁ କାନ୍ଥ ଭୁଶୁଡ଼ି ୨୨ ଜଣଙ୍କ ମୃତ୍ୟୁ ଘଟିଛି। ୩ଟି ଭିନ୍ନ ଭିନ୍ନ ସ୍ଥାନରେ ଏହି ଅଘଟଣ ଘଟିଛି। ଏଥିରେ ଅନ୍ୟ ୨୭ ଜଣ ଆହତ ହୋଇଥିବା ସୂଚନା ମିଳିଛି। ମୃତକଙ୍କ ପରିବାରକୁ ୫ ଲକ୍ଷ ଟଙ୍କାର ସହାୟତା ରାଶି ପ୍ରଦାନ ଲାଗି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ ଘୋଷଣା କରିଛନ୍ତି।
ସୂଚନା ମୁତାବକ, ପ୍ରଥମ ଘଟଣା ମୁମ୍ବଇ ପୂର୍ବ ମଲାଡ ଅଞ୍ଚଳର ପିମ୍ପରିପାଡ଼ାରେ ପ୍ରବଳ ବର୍ଷା ଯୋଗୁ ସୋମବାର ବିଳମ୍ବିତ ରାତିରେ କାନ୍ଥ ଭୁଶୁଡ଼ି ପଡ଼ିବାରୁ ୧୩ ଜଣଙ୍କ ମୃତ୍ୟୁ ଘଟିଛି। ଏଥିସହ ଅନ୍ୟ ୧୨ ଜଣ ଆହତ ହୋଇଛନ୍ତି। ସେମାନଙ୍କୁ ନିକଟ ହସ୍ପିଟାଲରେ ଭର୍ତ୍ତି କରାଯାଇଛି। ଏନଡିଆରଏଫ ଏବଂ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି।
ସେହିପରି ୨ୟ ଘଟଣାଟି ପୁଣେରେ ଘଟିଛି। ସୋମବାର ରାତି ପ୍ରାୟ ୧ଟା ୧୫ରେ ପୁଣେସ୍ଥିତ ଅମ୍ବେଗାଓଁରେ ଥିବା ସିଂହଗଡ଼ କଲେଜର ପାଚେରି ଭୁଶୁଡ଼ି ପଡ଼ିଥିଲା। କାନ୍ଥ ତଳେ ଚାପି ହୋଇ ୬ ଜଣଙ୍କ ମୃତ୍ୟୁ ଘଟିଛି। ଅନ୍ୟ ୪ ଜଣ ଆହତ ହୋଇଛନ୍ତି। ଏନଡିଆରଏଫ ଟିମ ପହଞ୍ଚି ସେମାନଙ୍କୁ ଉଦ୍ଧାର କରି ହସ୍ପିଟାଲକୁ ପଠାଇଛି। ଅନ୍ୟପଟେ ୩ୟ ଘଟଣାଟି ମୁମ୍ବଇର କଲ୍ୟାଣ ଅଞ୍ଚଳରେ ଘଟିଛି। ଏଠାରେ ଥିବା ନ୍ୟାଶନାଲ ଉର୍ଦ୍ଦୁ ହାଇସ୍କୁଲର ପାଚେରି ଭୁଶୁଡ଼ି ପଡ଼ିବାରୁ ୩ ଜଣଙ୍କ ମୃତ୍ୟୁ ଘଟିଛି। ଏଥିସହିତ ଆହୁରି ୧୦ ଜଣ ଆହତ ହୋଇଛନ୍ତି। ପାଚେରି ନିକଟରେ ଏହି ଲୋକମାନେ କୁଡ଼ିଆ ଘର କରି ରହୁଥିବା ସୂଚନା ମିଳିଛି।
ସୂଚନାଯୋଗ୍ୟ, ୩ଦିନ ତଳେ ପ୍ରବଳ ବର୍ଷା ଯୋଗୁ ପୁଣେର କାନ୍ଧୱା ଅଞ୍ଚଳରେ ଏକ ସୋସାଇଟିର ପାଚେରି ଭୁଶୁଡ଼ି ପଡ଼ିବାରୁ ୪ ଶିଶୁଙ୍କ ସମେତ ୧୫ ଜଣଙ୍କ ମୃତ୍ୟୁ ଘଟିଥିଲା।
