୨ହଜାର ବଦଳ ଆରମ୍ଭ ; ଭୟଭୀତ ହେବାର କୌଣସି ଆବଶ୍ୟକତା ନାହିଁ – ଶକ୍ତିକାନ୍ତ ଦାସ

ନୂଆଦିଲ୍ଲୀ : ଦେଶର ସମସ୍ତ ବ୍ୟାଙ୍କ ଏବଂ ରିଜର୍ଭ ବ୍ୟାଙ୍କର ୧୯ ଟି ଆଞ୍ଚଳିକ ଶାଖାରେ ଆଜି ଅର୍ଥାତ୍ ମଙ୍ଗଳବାର ଠାରୁ ଦୁଇ ହଜାର ଟଙ୍କିଆ ନୋଟ୍ ବଦଳାଯାଉଛି। ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି, ଲୋକଙ୍କ ପାଖରେ ଚାରିମାସ ସମୟ ଅଛି। ବ୍ୟାଙ୍କକୁ ଯାଇ ନୋଟ୍ ବଦଳାଇ ପାରିବେ। ଭୟଭୀତ ହେବାର କୌଣସି ଆବଶ୍ୟକତା ନାହିଁ । ବ୍ୟାଙ୍କଗୁଡ଼ିକରେ ପର୍ୟ୍ୟାପ୍ତ ଅର୍ଥ ଅଛି । ଶ୍ରୀ ଦାଶ କହିଛନ୍ତି, ବ୍ୟାଙ୍କ ଶାଖାଗୁଡ଼ିକରେ ଭିଡ଼ ହେବାର କୌଣସି ସମ୍ଭାବନା ନାହିଁ। ନୋଟ୍ ବଦଳାଇବାକୁ ବ୍ୟସ୍ତ କିମ୍ବା ତରବର ହେବାର ଆବଶ୍ୟକତା ନାହିଁ । ଏଥିସହ ଲୋକଙ୍କୁ ଭିଡ଼ ନକରିବାକୁ ସେ ଅନୁରୋଧ କରିଛନ୍ତି। ଶ୍ରୀ ଦାଶ ସ୍ପଷ୍ଟ କରିଛନ୍ତି, ବ୍ୟବସାୟୀଙ୍କ ସମେତ କୌଣସି ଅନୁଷ୍ଠାନ ୨,୦୦୦ ଟଙ୍କା ନୋଟ୍ ଗ୍ରହଣ କରିବାକୁ ମନା କରିପାରିବେ ନାହିଁ।
ଯେଉଁମାନଙ୍କ ପାଖରେ ବ୍ୟାଙ୍କ ଆକାଉଣ୍ଟ ନାହିଁ, କିନ୍ତୁ ୨୦୦୦ ନୋଟ୍ ଅଛି, ଅନ୍ୟମାନଙ୍କ ପରି ସେମାନେ ମଧ୍ୟ ନୋଟ୍‌‌ ବଦଳାଇ ପାରିବେ। ଲୋକେ ଆଶ୍ୱସ୍ତ ରୁହନ୍ତୁ। ପର୍ୟ୍ୟାପ୍ତ ସଂଖ୍ୟକ ମୁଦ୍ରିତ ନୋଟ୍ ଉପଲବ୍ଧ । ଆରବିଆଇ ଏବଂ ବ୍ୟାଙ୍କଗୁଡ଼ିକରେ ପର୍ୟ୍ୟାପ୍ତ ଅର୍ଥ ଅଛି ।
୨୦୦୦ ନୋଟ୍ ଟଙ୍କା ନେଣଦେଣରେ କ୍ୱଚିତ୍ ବ୍ୟବହାର ହେଉଛି । ଏହି ନୋଟ୍‌‌ ପ୍ରଚଳନରେ ମୋଟ ମୁଦ୍ରାର ମାତ୍ର ୧୦.୮%। ତେଣୁ ଏଥିପାଇଁ ଆର୍ଥିକ କାର୍ଯ୍ୟକଳାପ ପ୍ରଭାବିତ ହେବ ନାହିଁ।
ଆରବିଆଇ ଗଭର୍ଣ୍ଣର ଶ୍ରୀ ଦାସ କହିଛନ୍ତି, ଏହାକୁ ଗମ୍ଭୀରତାର ସହିତ ନେବା ପାଇଁ ନୋଟ୍ ବଦଳାଇବାର ସମୟ ସୀମା ସେପ୍ଟେମ୍ବର ୩୦ ପର୍ଯ୍ୟନ୍ତ ସ୍ଥିର କରାଯାଇଛି। ନଚେତ୍ ଜମା କିମ୍ବା ରୂପାନ୍ତର ପ୍ରକ୍ରିୟା କ୍ରମାଗତ ଭାବରେ ଚାଲିବ । ସେପ୍ଟେମ୍ବର ୩୦ ପରେ କ’ଣ ହେବ ସେ ସମ୍ପର୍କରେ ବର୍ତ୍ତମାନ କୌଣସି ନିଷ୍ପତ୍ତି ନିଆଯାଇ ନାହିଁ। ପରବର୍ତ୍ତୀ ନିଷ୍ପତ୍ତି କେବଳ ୩୦ ସେପ୍ଟେମ୍ବରରେ ନିଆଯିବ।