ଶ୍ରୀନଗର: ଜାମ୍ମୁ-କାଶ୍ମୀରର ସୋପିଆନ ଜିଲାରେ ଶନିବାର ଭୋର ସମୟରେ ଯବାନ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ ଘଟିଛି। ଯବାନଙ୍କ ଗୁଳିରେ ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦର ଜଣେ କମାଣ୍ଡରଙ୍କ ସମେତ ୨ ଆତଙ୍କ ନିହତ ହୋଇଛନ୍ତି। ସୋପିଆନର ବୋନବଜାର ବନ୍ଦେ ମହଲା ଅଞ୍ଚଳରେ ଏହି ଏନକାଉଣ୍ଟର ଘଟିଛି। ନିହତ ଆତଙ୍କୀଙ୍କଠାରୁ କିଛି ଅସ୍ତ୍ରଶସ୍ତ୍ର ଏବଂ ଗୋଳାବାରୁଦ ଜବତ ହୋଇଛି। ନିହତ ଆତଙ୍କୀ ମଧ୍ୟରେ ଜୈଶର କମାଣ୍ଡର ମୁନ୍ନା ଲାହୋରି ରହିଛି। କାଶ୍ମୀରରେ ଅନେକ ଜନସାଧାରଣଙ୍କୁ ଆତଙ୍କବାଦୀଙ୍କ ହତ୍ୟା ପଛରେ ମୁନ୍ନାର ହାତ ରହିଛି। ଏନକାଉଣ୍ଟରରେ ନିହତ ଅନ୍ୟ ଆତଙ୍କବାଦୀ ଜଣକ ମୁନ୍ନାର ସହଯୋଗୀ। ମୁନ୍ନା ଜୈଶ ସଂଗଠନରେ ଯୁବକଙ୍କୁ ନିଯୁକ୍ତ କରାଉଥିଲା। ସେ ଆଇଇଡି ତିଆରି କରିବାରେ ମଧ୍ୟ ସିଦ୍ଧହସ୍ତ ବୋଲି ପୁଲିସ ସୂତ୍ରରୁ ସୂଚନା ମିଳିଛି।
ବନ୍ଦେ ମହଲା ଅଞ୍ଚଳରେ ଆତଙ୍କବାଦୀ ଲୁଚି ରହିଥିବା ସମ୍ପର୍କରେ ଖବର ମିଳିବା ପରେ ସେନା ପକ୍ଷରୁ ସେଠାରେ ଚଢ଼ାଉ କରାଯାଇଥିଲା। ଯବାନମାନେ ସମ୍ପୃକ୍ତ ଅଞ୍ଚଳକୁ ଘେରିଯିବାରୁ ଆତଙ୍କୀମାନେ ଗୁଳିମାଡ଼ କରିଥିଲେ। ଫଳରେ ସେଠାରେ ଗୁଳିବିନିମୟ ଘଟିଥିଲା। ଘଟଣା ପରେ ସେନା ପକ୍ଷରୁ ସମ୍ପୃକ୍ତ ଅଞ୍ଚଳକୁ ସିଲ୍ କରିଦିଆଯିବା ସହିତ ସର୍ଚ୍ଚ ଅପରେଶନକୁ ଜୋରଦାର କରାଯାଇଛି।
