ଜାମ୍ମୁ: ଜାମ୍ମୁ-କାଶ୍ମୀର ନିୟନ୍ତ୍ରଣ ରେଖାରେ ଅନୁପ୍ରବେଶ ଯୋଜନାକୁ ସଫଳ କରିବା ଲାଗି ପାକିସ୍ତାନୀ ସୈନ୍ୟ ପକ୍ଷରୁ ଆରମ୍ଭ ହୋଇଥିବା ଅସ୍ତ୍ରବିରତି ଉଲ୍ଲଂଘନର କଡ଼ା ଜବାବ ଦେଇଛି ଭାରତ। ଭାରତୀୟ ସେନାର ଜବାବୀ କାର୍ଯ୍ୟାନୁଷ୍ଠାନରେ ୨ ପାକ୍ ସୈନ୍ୟ ଏବଂ ୩ ଅନୁପ୍ରବେଶକାରୀ ନିହତ ହୋଇଛନ୍ତି।
ସୂଚନା ଅନୁସାରେ, ଜାମ୍ମୁର ପାଲାମ୍ବାଲା-ସୁନ୍ଦରବନୀ ସେକ୍ଟରର କେରୀ ବଟ୍ଟଲ ଅଞ୍ଚଳରେ ସୋମବାର ସନ୍ଧ୍ୟାରେ ପାକ୍ ସେନା ପକ୍ଷରୁ ଅସ୍ତ୍ରବିରତି ଉଲ୍ଲଂଘନ କରାଯାଇଥିଲା। ଭାରତୀୟ ସେନା ଶିବିର ଉପରକୁ ପାକ୍ ସୈନ୍ୟଙ୍କ ପକ୍ଷରୁ ଗୁଳିମାଡ଼ କରାଯାଇଥିଲା। ଭାରତୀୟ ସୈନ୍ୟଙ୍କୁ ବିଚଳିତ କରି ଆତଙ୍କବାଦୀଙ୍କୁ ଅନୁପ୍ରବେଶ କରାଇବାକୁ ପାକ୍ ସେନା ଷଡ଼ଯନ୍ତ୍ର କରିଥିଲା। ଏପରି କି ପାକ୍ ସେନାର ଗୁଳିମାଡ଼ରେ ୨ ଭାରତୀୟ ଯବାନ ଶହୀଦ ହୋଇଥିଲେ। ଏହାପରେ ଭାରତ ପକ୍ଷରୁ କଡ଼ା ଜବାବ ଦିଆଯାଇଥିଲା। ଯବାନଙ୍କ ପାଲଟା ଆକ୍ରମଣରେ ୨ ପାକ୍ ସୈନ୍ୟ ନିହତ ହେବା ସହିତ ୩ ଅନୁପ୍ରବେଶକାରୀ ମଧ୍ୟ ନିପାତ ହୋଇଥିଲେ। ରାତି ସାରା ଗୁଳି ବିନିମୟ ଜାରି ରହିଥିଲା। ଭାରତୀୟ ସେନା ଗୁଳିରେ ଅନ୍ୟ ୪ ପାକ୍ ସୈନ୍ୟ ଆହତ ହୋଇଛନ୍ତି। ପାକ୍ ସେନାର ଅନେକ ଶିବିର ଧ୍ଵସ୍ତବିଧ୍ଵସ୍ତ ହୋଇଛି।
