କଲୋମ୍ବୋ: ଶ୍ରୀଲଙ୍କାର ପୂର୍ବାଞ୍ଚଳ ସହର କାଲମୁନାଇରେ ୧୫ ସନ୍ଦିଗ୍ଧ ଆଇଏସ୍ ଆତ୍ମଘାତୀ ଆତଙ୍କବାଦୀଙ୍କୁ ସୁରକ୍ଷାକର୍ମୀମାନେ ନିପାତ କରିଛନ୍ତି। ସହରର ଏକ ଘରେ ଆତଙ୍କୀମାନେ ଲୁଚିଥିବା ଖବର ପାଇ ସୁରକ୍ଷା କର୍ମୀ ଏବଂ ପୁଲିସ ସେଠାରେ ଚଢ଼ାଉ କରିଥିଲେ। ଏହି ସମୟରେ ବନ୍ଧୁକଧାରୀ ଆତଙ୍କୀମାନେ ପୁଲିସ ଉପରକୁ ଗୁଳି ଚଳାଇଥିଲେ। ଉଭୟ ପକ୍ଷ ମଧ୍ୟରେ ଅନେକ ସମୟ ଧରି ଗୁଳିବିନିମୟ ଚାଲିଥିଲା। ସୁରକ୍ଷାକର୍ମୀଙ୍କ ଗୁଳିରେ ୨ ସନ୍ଦିଗ୍ଧ ବନ୍ଧୁକଧାରୀଙ୍କ ସମେତ ୧୫ ସନ୍ଦିଗ୍ଧ ନିହତ ହୋଇଥିଲେ। ଗୁଳିବିନିମୟ ବେଳେ ଜଣେ ସାଧାରଣ ନାଗରିକଙ୍କର ବି ମୃତ୍ୟୁ ହୋଇଥିଲା। ପରେ ପୁଲିସ ଗଣମାଧ୍ୟମକୁ କହିଥିଲା ଯେ, ଏହି ଅପରେଶନରେ ମୋଟ ୧୫ ଜଣ ସନ୍ଦିଗ୍ଧ ନିହତ ହୋଇଛନ୍ତି। ଘଟଣା ସ୍ଥଳରୁ ସେମାନଙ୍କ ମୃତଦେହ ଜବତ ହୋଇଛି।
କଲୋମ୍ବୋ ସହରରେ ହୋଇଥିବା ସିରିଜ ବିସ୍ଫୋରଣ ଘଟଣା ପୂର୍ବରୁ କାଲମୁନାଇ ସହରର ଉକ୍ତ ଘରେ ଏକ ଭିଡିଓ ରେକର୍ଡ କରାଯାଇଥିବା ସନ୍ଦେହରେ ସୁରକ୍ଷାକର୍ମୀ ଏବଂ ପୁଲିସ ପକ୍ଷରୁ ମିଳିତ ଅପରେଶନ କରାଯାଇଥିଲା। ଚଢ଼ାଉ ବେଳେ ଗୁଳିବିନିମୟ ଘଟିଥିଲା। ଏଥିରେ କୌଣସି ସୁରକ୍ଷାକର୍ମୀ କିମ୍ବା ପୁଲିସ କର୍ମଚାରୀ ମୃତାହତ ହୋଇ ନ ଥିବା ପୁଲିସ କହିଛନ୍ତି। ଘଟଣାସ୍ଥଳରୁ ଆଇଏସ ପତାକା ଏବଂ କିଛି ପୋଷାକ ମିଳିଥିଲା। ଗତ ରବିବାର ସିରିଜ ବିସ୍ଫୋରଣ କରିଥିବା ଆତ୍ମଘାତୀମାନେ ଯେପରି ପୋଷାକ ପିନ୍ଧିଥିଲେ ଜବତ ହୋଇଥିବା ପୋଷାକ ମଧ୍ୟ ସେହିଭଳି ବୋଲି ପୁଲିସ କହିଛି।
