ସଂସଦର ମୌସୁମୀ ଅଧିବେଶନ ସମାପ୍ତ

ଉଭୟ ଗୃହରେ ମୋଟ ୧୩ଟି ବିଲ୍ ପାରିତ

Copy Editor AH | Published On: Aug 11, 2017 07:51 PM IST |   177

• ଉଭୟ ଗୃହରେ ମୋଟ ୧୩ଟି ବିଲ୍ ପାରିତ • ଲୋକସଭାରେ ୭୭.୯୪% ଏବଂ ରାଜ୍ୟସଭାରେ ୭୯.୯୫% କାର୍ଯ୍ୟ ସମ୍ପନ୍ନ 

ନୂଆଦିଲ୍ଲୀ : ସଂସଦର ମୌସୁମୀ ଅଧିବେଶନ-୨୦୧୭ ଗୃହ କାର୍ଯ୍ୟ ଦୃଷ୍ଟିରୁ ବେଶ ସଫଳ ଅଧିବେଶନ ହୋଇପାରିଛି । ସମସ୍ତ ରାଜନୈତିକ ଦଳ ଜାତୀୟ ଗୁରୁତ୍ୱ ବହନ କରୁଥିବା ବିଭିନ୍ନ ପ୍ରସଙ୍ଗର ଆଲୋଚନାରେ ଅଂଶ ଗ୍ରହଣ କରିଥିବାରୁ ଏହା ସଫଳ ହୋଇପାରିଥିବା କହିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ ଅନନ୍ତ କୁମାର । ଅଧିବେଶନ ଶେଷ ହେବା ପରେ ଗଣମାଧ୍ୟମକୁ ସେ କହିଥିଲେ ଯେ, ୧୭ ଜୁଲାଇରେ ଆରମ୍ଭ ହୋଇଥିବା ସଂସଦର ମୌସୁମୀ ଅଧିବେଶନ ୧୧ ଅଗଷ୍ଟ ୨୦୧୭ରେ ଶେଷ ହୋଇଛି । ଉଭୟ ଗୃହକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ମୁଲତବୀ ରଖାଯାଇଛି । ୨୬ ଦିନରେ ମୋଟ ୧୯ଟି ଅଧିବେଶନ ହୋଇଥିଲା । ଲୋକସଭାରେ ୭୭.୯୪% କାର୍ଯ୍ୟ  ହୋଇପାରିଥିବା ବେଳେ ରାଜ୍ୟସଭାରେ ୭୯.୯୫% କାର୍ଯ୍ୟ ହୋଇଛି । ଅଧିବେଶନ କାଳରେ ଲୋକସଭାରେ ୧୪ଟି ଏବଂ ରାଜ୍ୟସଭାରେ ୯ଟି ବିଲ୍ ପାରିତ ହୋଇଛି । ଉଭୟ ଗୃହରେ ମୋଟ ୧୩ଟି ବିଲ୍ ପାରିତ ହୋଇପାରିଛି । ଅଧିବେଶନ କାଳରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବା ସହ ରାଷ୍ଟ୍ରପତି ଓ ଉପରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହୋଇଥିଲା । ଭାରତ ଛାଡ଼ ଆନ୍ଦୋଳନର ୭୫ ତମ ବାର୍ଷିକୀ ଅବସରରେ ୯ ଅଗଷ୍ଟ ୨୦୧୭ରେ ସଂସଦରେ ସ୍ୱତନ୍ତ୍ର ଆଲୋଚନା ହୋଇଥିଲା । ସମସ୍ତ ଦଳର ସହମତି କ୍ରମେ ପ୍ରଥମ ଥର ପାଇଁ ୨୦୨୨ ସୁଦ୍ଧା ନୂଆ ଭାରତ ଗଠନ ସକାଶେ ‘ସଂକଳ୍ପ ସେ ସିଦ୍ଧି’ ଶପଥ ନିଆଯାଇଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଏହି ଲକ୍ଷ୍ୟ ହାସଲ ପାଇଁ ସରକାର ପ୍ରତିଶ୍ରୁତିବଦ୍ଧ । ଜମ୍ମୁ-କାଶ୍ମୀର ବିଧାନସଭାରେ ଜିଏସଟି ବିଲ୍ ପାରିତ ହେବା ମଧ୍ୟ ଏକ ଉପଲବ୍ଧି । ଅଧିବେଶନ କାଳରେ ୨୦୧୭-୧୮ର ଅତିରିକ୍ତ ଖର୍ଚ୍ଚ ଦାବି (ରେଳବାଇ ସମେତ) ଲୋକସଭାରେ ଗୃହୀତ ହେବା ପରେ ରାଜ୍ୟସଭାକୁ ୨ ଅଗଷ୍ଟ ୨୦୧୭ରେ ପଠାଯାଇଥିଲା । ରାଜ୍ୟସଭାରେ ଏହା ଗୃହୀତ ହୋଇ ନଥିଲେ ବି ଗ୍ରହଣ ହେବାର ୧୪ ଦିନ ମଧ୍ୟରେ ଲୋକସଭାକୁ ଫେରସ୍ତ ହୋଇ ନଥିବାରୁ ଏହା ସ୍ୱୟଂ ଭାବେ ପାରିତ ହୋଇଯିବ । ଅଧିବେଶନ ପୂର୍ବରୁ ଜାରି ହୋଇଥିବା ଚାରୋଟି ଅଧ୍ୟାଦେଶକୁ ପ୍ରତ୍ୟାହାର ସକାଶେ ୪ଟି ବିଲ୍ ମଧ୍ୟ ପାରିତ ହୋଇଥିବା ଶ୍ରୀ ଅନନ୍ତ କୁମାର କହିଥିଲେ । ଏହି ଅବସରରେ  ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ  ଏସ୍ ଏସ୍ ଆଲୁୱାଲିଆ, ସଂଖ୍ୟାଲଘୁ ବ୍ୟାପାର(ସ୍ୱାଧୀନ) ଏବଂ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ମୁକ୍ତାର ଅବାସ ନକଭୀ ଉପସ୍ଥିତ ଥିଲେ । 

Tags:

Like Us

Breaking News

ଧନୁ ସଂକ୍ରାନ୍ତିରେ ଶ୍ରୀମନ୍ଦିରରେ ଆରମ୍ଭ ହେଲା ପହିଲି ଭୋଗ ନୀତି କୋଇଲା ଦୁର୍ନୀତି ଅଭିଯୋଗରେ ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀଙ୍କ ସମେତ ୪ ଜଣଙ୍କୁ କାରାଦଣ୍ଡାଦେଶ ଭୁବନେଶ୍ବର: ୧୭ତମ ଫେଡେରସନ୍ କପ୍ କରାଟେ ପ୍ରତିଯୋଗୀତା ଆରମ୍ଭ ଅନୁଗୁଳ: ଖମାର ରେଞ୍ଜ ନିକଟବର୍ତ୍ତି ଅଞ୍ଚଳରେ ହାତୀ ଆକ୍ରମଣରେ ମହିଳା ମୃତ