ସବରିମଲ ମନ୍ଦିରରେ ମହିଳାଙ୍କ ପ୍ରବେଶ ପ୍ରସଙ୍ଗ

ମାମଲାର ଶୁଣାଣି ସାମ୍ବିଧାନିକ ପୀଠକୁ ଗଲା

Copy Editor AH | Published On: Oct 13, 2017 07:45 PM IST | Updated On: Oct 13, 2017 07:51 PM IST |   183

ନୂଆଦିଲ୍ଲୀ : କେରଳର ପ୍ରସିଦ୍ଧ ତଥା ଐତିହାସିକ ସବରିମଲ ମନ୍ଦିରରେ ମହିଳାଙ୍କ ପ୍ରବେଶ ଉପରେ ଜାରି ହୋଇଥିବା କଟକଣା ପ୍ରସଙ୍ଗରେ ଆଗତ ଏକ ପିଟିସନ୍‌ର ଶୁଣାଣି ପାଞ୍ଚଜଣିଆ ସାମ୍ବିଧାନିକ ପୀଠରେ ହେବ ବୋଲି ସୁପ୍ରିମକୋର୍ଟ ଶୁକ୍ରବାର ନିର୍ଦେଶ ଦେଇଛନ୍ତି । ବର୍ତ୍ତମାନ ପ୍ରାପ୍ତବୟସ୍କଭାବେ ବିବେଚିତ ୧୦ରୁ ୫୦ ବର୍ଷ ବୟସ ପର୍ଯ୍ୟନ୍ତ ମହିଳାଙ୍କୁ ସବରିମଲ ମନ୍ଦିରରେ ପ୍ରବେଶ ନିମନ୍ତେ ଅନୁମତି ପ୍ରଦାନ କରାଯାଉନାହିଁ । ଏହାର ପ୍ରତିବାଦରେ ‘ଇଣ୍ଡିଆନ ୟଙ୍ଗ୍‌ ଲୟର୍ସ ଆସୋସିଏସନ’ ପକ୍ଷରୁ ସୁପ୍ରିମକୋର୍ଟରେ ଏକ ମାମଲା ଦାଏର କରାଯାଇଥିଲା । ପ୍ରଧାନ ବିଚାରପତି ଜଷ୍ଟିସ ଦୀପକ ମିଶ୍ର, ଜଷ୍ଟିସ ଆର.ଭାନୁମତି ଓ ଜଷ୍ଟିସ ଅଶୋକ ଭୂଷଣଙ୍କୁ ନେଇ ଗଠିତ ପୀଠ ଶୁକ୍ରବାର ଏହାର ଶୁଣାଣି କରି ଏହି ନିର୍ଦେଶ ଦେଇଛନ୍ତି । ପୂର୍ବରୁ ମଧ୍ୟ ଏହି କଟକଣା ପ୍ରତିବାଦରେ ସୁପ୍ରିମକୋର୍ଟରେ ପିଟିସନ ଦାଏର ହୋଇଥିଲା । ୨୦୧୭ ଫେବୃୟାରୀରେ ସୁପ୍ରିମକୋର୍ଟ ଏହାର ଶୁଣାଣି କରି ସାମ୍ବିଧାନିକ ବ୍ୟବସ୍ଥା ମଧ୍ୟରେ ହୋଇପାରୁଥିବା ସମାଧାନ ସମ୍ପର୍କରେ ଲିଖିତ ଜବାବ ଦାଖଲ କରିବାକୁ ଉଭୟପକ୍ଷଙ୍କୁ ନିର୍ଦେଶ ଦେଇଥିଲେ । ମନ୍ଦିରର ପରମ୍ପରାକୁ ଆଧାର କରି କେରଳ ହାଇକୋର୍ଟ ୧୯୯୧ରେ ଦେଇଥିବା ରାୟ ଅନୁଯାୟୀ ୧୦-୫୦ ବର୍ଷ ବୟସ୍କ ମହିଳାଙ୍କୁ ମନ୍ଦିରରେ ପ୍ରବେଶ ଉପରେ କଟକଣା ଜାରି କରିଥିଲେ । ୨୦୦୭ରେ କେରଳରେ ଏଲଡିଏଫ୍‌ ସରକାର କ୍ଷମତାସୀନ ଥିବାବେଳେ ସେମାନେ ଏହି କଟକଣାକୁ କୋହଳ କରିଥିଲେ ସୁଦ୍ଧା ପରବର୍ତ୍ତୀ ସମୟରେ ୟୁଡିଏଫ୍‌ ସରକାର କଟକଣା ସପକ୍ଷରେ ମତ ଦେଇଥିଲେ । ୨୦୧୬ରେ ଏଲଡିଏଫ୍‌ ପୁଣି କ୍ଷମତାକୁ ଆସିବାପରେ ସବୁ ବୟସର ମହିଳାଙ୍କ ପ୍ରବେଶକୁ ସମର୍ଥନ ଜଣାଇଛନ୍ତି । ସମୁଦ୍ର ପତନଠାରୁ ପ୍ରାୟ ୪୦୦୦ ଫୁଟ ଉଚ୍ଚରେ ପଶ୍ଚିମଘାଟ ପର୍ବତମାଳାରେ ଅବସ୍ଥିତ ଏହି ମନ୍ଦିର ଦ୍ୱାଦଶ ଶତାବ୍ଦୀରେ ପାଣ୍ଡଳମ ରାଜବଂଶ ଦ୍ୱାରା ନିର୍ମିତ ହୋଇଥିବା ସମ୍ପର୍କରେ ଐତିହାସିକମାନେ ମତବ୍ୟକ୍ତ କରିଛନ୍ତି । ସାଉଦି ଆରବର ମକ୍କା ପରେ ସବରିମଲ ମନ୍ଦିରରେ ବର୍ଷର ନିର୍ଦ୍ଦିଷ୍ଟ ସମୟରେ ଭକ୍ତଙ୍କର ସବୁଠାରୁ ବେଶି ଭିଡ ପରିଲକ୍ଷିତ ହୋଇଥାଏ । ପ୍ରତିବର୍ଷ ନଭେମ୍ବର ୧୫ରୁ ଡିସେମ୍ବର ୨୬ ମଧ୍ୟରେ ଏଠାରେ ମଣ୍ଡଳପୂଜା ଅନୁଷ୍ଠିତ ହେଉଥିବାବେଳେ ଲକ୍ଷାଧିକ ଭକ୍ତଙ୍କର ସମାଗମ ହୋଇଥାଏ । ମନ୍ଦିରରେ ପ୍ରଭୁ ଆୟାପ୍ପା ପୂଜା ପାଇଥାନ୍ତି । ଗତବର୍ଷ ଏହି ସମୟରେ ୩.୫ କୋଟି ଭକ୍ତ ସାବରିମଲ ମନ୍ଦିର ପରିଦର୍ଶନ କରିଥିବାବେଳେ ୨୪୪ କୋଟି ଟଙ୍କାର ରାଜସ୍ୱ ଆଦାୟ ହୋଇଥିଲା । ପୌରାଣିକ ମତବାଦ ଅନୁଯାୟୀ ପର୍ଶୁରାମ ନିଜର ଫାର୍ସା ସାହାଯ୍ୟରେ କେରଳକୁ ସମୁଦ୍ର ଗର୍ଭରୁ ଉଦ୍ଧାର କରି ସାବରିମଲଠାରେ ପ୍ରଭୁ ଆୟାପ୍ପାଙ୍କୁ ପ୍ରତିଷ୍ଠା କରିଥିଲେ । ପ୍ରଭୁ ଆୟାପ୍ପା ଜଣେ ନୈଷ୍ଠିକ ବ୍ରହ୍ମଚାରୀ ହୋଇଥିବାରୁ ମନ୍ଦିରରେ ରୁତୁସ୍ରାବ ବୟସ ଛୁଇଁଥିବା ମହିଳାଙ୍କ ପାଇଁ ଏଠାରେ ପ୍ରବେଶ କଟକଣା ଲାଗୁ କରାଯାଇଛି । ତେବେ ଏଭଳି ନିୟମ ସମ୍ବିଧାନ ବିରୋଧୀ ଓ ମହିଳାଙ୍କ ଅଧିକାରକୁ କ୍ଷୁଣ୍ଣ କରୁଛି ବୋଲି ସମାଲୋଚକମାନେ ମତବ୍ୟକ୍ତ କରିଛନ୍ତି । ୨୦୦୬ରେ ଏହି ପ୍ରସଙ୍ଗ ନେଇ ଏକ ବିବାଦ ସୃଷ୍ଟି ହୋଇଥିଲା । ଏହି ମନ୍ଦିରରେ ପ୍ରବେଶ କରି ପ୍ରଭୁ ଆୟାପ୍ପାଙ୍କୁ ସ୍ପର୍ଶ କରିଛନ୍ତି ବୋଲି କନ୍ନଡ ଅଭିନେତ୍ରୀ ଜୟମାଲା ସେତେବେଳେ ଦାବି କରିଥିଲେ । କେରଳ ସରକାର ଏହାର କ୍ରାଇମବ୍ରାଞ୍ଚ ତଦନ୍ତ ନିର୍ଦେଶ ଦେଇଥିଲେ ସୁଦ୍ଧା ପରବର୍ତ୍ତୀ ସମୟରେ ଏହାକୁ ପ୍ରତ୍ୟାହାର କରିନେଇଥିଲେ । ପ୍ରବଳ ଭିଡ ଯୋଗୁଁ ଏହି ମନ୍ଦିରରେ ଦୁଇଥର ଦଳାଚକଟା ହୋଇଥିବାର ଦୃଷ୍ଟାନ୍ତ ରହିଛି । ୧୯୯୯ ଜାନୁଆରୀ ୧୪ରେ ଦଳାଚକଟା ଯୋଗୁଁ ୨୦୦ରୁ ଅଧିକ ଭକ୍ତ ପ୍ରାଣ ହରାଇଥିବାବେଳେ ୨୦୧୧ରେ ୧୦୪ ଜଣ ଭକ୍ତଙ୍କର ମୃତ୍ୟୁ ଘଟିଥିଲା ।
Tags:

Like Us

Breaking News

ତୃତୀୟ ଦିନିକିଆରେ ଶ୍ରୀଲଙ୍କାକୁ ୮ ୱିକେଟରେ ପରାସ୍ତ କରିବା ସହିତ ଭାରତ ୨-୧ରେ ଦିନିକିଆ ସିରିଜ ବିଜୟୀ । ବିଶାଖାପାଟଣା ଦିନିକିଆରେ ଭାରତକୁ ୨୧୬ ରନ୍‌ ଟାର୍ଗେଟ ଦେଲା ଶ୍ରୀଲଙ୍କା କଟକ: ଟିକେଟ୍ ବିକ୍ରିକୁ ନେଇ ବାରବାଟୀରେ ଉତ୍ତେଜନା ବାଲେଶ୍ବର: ସୋର ଛପୋଲିଆରେ ଦୁର୍ଘଟଣା. ଅଳ୍ପକେ ବର୍ତ୍ତିଲେ ଡ୍ରାଇଭର ହେଲପର